مشكله وياريت تساعدوني فيها,,,,,
عندي مشكله وبصراحه محزنتني لدرجه كبيره .. المشكله مشكله بنت اعتبرها اكثر من أخت، هذي البنت جامعيه من عايله معروفه في المنطقه وعايشه بخير، المشكله ان كل ما يتقدمون لها شباب أهلها يطلعون العيب فيه أما عمله مو حكومي أو راتبه ضعيف
( ما يوكل عيش على قولتنا) وهالبنت قربت تخلص الجامعه وهي كلما يتقدم لها واحد خالاتها واهلها تدخلوا بالموضوع وكنسلوه، صديقاتها بسنها كل وحده منخطبه و متزوجه الا هذي على درجه من الجمال لكن كل ما يتقدم لها شخص انرفض من جهة أهلها..
المشكله انها كانت تسكت وتخليهم يتحكمون في حياتها، لما قبل كم يوم تقدم لها شاب شغلته حكوميه وراتبه تمام وعنده شقه كبيره هو بناها لحاله، يعني تقدرون تقولون ان الشاب معتمد على نفسه وراتبه يعيش، لما اتصلت اخت الشاب تخطب البنت قالت لها البنت لازم أسال امي وابوي حتى يسألون عنكم وعن فصلكم قالت لها صار خير من حقكم تسألوا..
المهم الام سألت عن الولد وعن العايله وطلعوا خوووش عايله ومحترمين .. بس المشكله لما سألوا عن شغلته شنهي بالضبط قالوا لهم سكورتي ( رجل أمن)، من هني الأم والخالات بدأوا يتدخلون ويقولون لها ما يصير تاخذين واحد شغلته جذي بكره يسألونك الناس شنو يشتغل زوجك تقولون لهم حارس!!!!!! (( الشاب سكورتي وليس حارس ))
اتصلت فيني هالبنت تبكي تقول ان الولد ارتحت له وهو يبيني ومستعد يسوي كل شي علشاني، وعنده مكان يعيشني فيه ومعاشه انا مقتنعه فيه بس أهلي بعد مره ثانيه رفضوه على شنو (( على مسمى وظيفته ))
البنت كسرت خاطري حياتها اختلفت، صارت على طول حزينه وما تبي تشوف احد، خاصه وانها جميله وهذا يسبب لها مشاكل فهي تفكر ان الزواج بيخليها تعيش بسلام وراحه ...
أنا اعتبر اللي بهالمنتدى مثل اخواني وأخواتي من جذي ابي مشورتكم بهالموضوع ويا ريت تكتبون الحل اللي يخلي هالاهل الحاقدين والمتعقدين يرضون بالموضوع .. خاصة وأن الولد شاب محترم ومن عايله محترمه وما في سبب رئيسي كبير يخليهم يرفضون غير مسمى الوظيفة ....
لكم مني كل الشكر والتقدير وعذراً على الاطاله ..
بارك الله فيكم..
رد مع اقتباس
الموضوع ومافيه أن هاليوزر سيتم ركنه حتى أشعار آخر ويستخدم فقط للدعم الفني .
